​பாடம் - 4: சீர்

 ​பாடம் - 4 

சீர்

----

அசைகள் ஒன்றோடு ஒன்று சேர்ந்தது சீர் எனப்படும். அச்சீர் ஈரசைச்சீர், மூவசைச்சீர், என இருவகைப்படும்.

ஈரசைச்சீர் - 4

~~

நேர், நிரை என்னும்  அசை இரண்டினையும் பெருக்கினால் (2×2=4) ஈரசைச்சீர் நான்காகும்.

நேர் நேர்      - தேமா

நிரை நேர்    - புளிமா

நிரை நிரை - கருவிளம்   

நேர் நிரை    - கூவிளம் 

இவ்வீரசைச் சீர்கள் நான்கும் ஆசிரியப்பாவுக்கு உரியவை. இவை இயற்சீர், ஆசிரிய உரிச்சீர், அகவற்சீர் எனவும் பெயர் பெறும்.

தேமா, புளிமா எனும் இவ்விரண்டும் 'மாச்சீர்' எனவும், 

கருவிளம், கூவிளம் எனும் இவ்விரண்டும் 'விளச்சீர்' எனவும் வழங்கப்பெறும்.

மாச்சீர்  - நேரீற்று ஈரசைச்சீர்

விளச்சீர் - நிரையீற்று ஈரசைச்சீர்

தேமா, புளிமா, கருவிளம், கூவிளம் எனும்  இவை வாய்பாடுகளாகும். வாய்பாடுகளை அசை பிரித்தால் சீர்கள் வந்துவிடும்.

தே/மா

நேர்/நேர்

புளி/மா

நிரை/நேர்

கரு/விளம்

நிரை/நிரை

கூ/விளம்

நேர்/நிரை.

இஃது இனிவரும் வாய்பாடுகளுக்கும் பொருந்தும். இவ்வாய்பாடுகள் 'தளை' இலக்கணத்திற்கு முதன்மையானவை. இவற்றை நன்கு மனத்துள் நிறுத்துக.

மூவசைச்சீர் - 8

~~~

தேமா, புளிமா, கருவிளம், கூவிளம் எனும் ஈரசைச் சீர்கள் நான்கனோடும் நேரசை  நிரையசை இரண்டினையும் தனித்தனியே சேர்த்தால் மூவசைச்சீர் (4×2=8) எட்டாகும்.

நேர் நேர் நேர்      - தேமாங்காய்

நிரை நேர் நேர்   - புளிமாங்காய்

நிரை நிரை நேர் - கருவிளங்காய்

நேர் நிரை நேர்   -  கூவிளங்காய்

இவை நான்கும் நேரீற்று மூவசைச்சீர். இவை காய்ச்சீர் எனவும், வெண்சீர் எனவும் வழங்கப்பெறும். இவை வெண்பாவுக்கு உரியவை.

நேர் நேர் நிரை     - தேமாங்கனி

நிரை நேர் நிரை    - புளிமாங்கனி

நிரை நிரை நிரை -  கருவிளங்கனி

நேர் நிரை நிரை    -  கூவிளங்கனி

இவை நான்கும் நிரையீற்று மூவசைச்சீர். இவை கனிச்சீர் எனவும், வஞ்சிச்சீர் எனவும் வழங்கப்பெறும். இவை வஞ்சிப்பாவுக்கு உரியவை.

ஆசிரியர்: 

செ. வெங்கடேசு ஐயா அவர்கள், 

ஏகாபுரம், 

சேலம் மாவட்டம்.